Գազի սակագների հնարավոր բարձրացումն անմիջականորեն կազդի պետական թատրոնների գործունեության վրա, քանի որ թատրոններում, ինչպես նաև մյուս պետական հաստատություններում, 2010 թ. բյուջեով գազի համար ավելի ցածր գումարներ են նախատեսվել:

«Մենք ամսական ծախսում ենք 4 մլն դրամ (10600 դոլար) հսկայական օպերայի շենքը պահելու համար, եթե սակագները բարձրանան 41 տոկոսով, այդ գումարը զգալիորեն կաճի»,- մտահոգվում է Ալ. Սպենդիարյանի անվան օպերայի և բալետի ազգային ակադեմիական թատրոնի գլխավոր տնօրեն Կամո Հովհաննիսյանը:

Երևանում գործում են 15 պետական թատրոններ, որոնց մեջ ամենախոշորը Ալ. Սպենդիարյանի անվան օպերայի և բալետի ազգային ակադեմիական թատրոնի շենքն է:

Երեքշաբթի մամուլի ասուլիսի ժամանակ Հովհաննիսյանը խոսել է նաև անցյալ տարվա իրենց հաջողված ներկայացումների և այս տարվա ծրագրերի մասին:

ԱՄՆ-ից հրավիրվել է նոր բալետմայստեր` Ռուդոլֆ Խառատյանը` խաղացանկը հարստացնելու նպատակով: Այս տարի արդեն սկսել են բեմադրել նաև Ջուզեպե Վերդիի «Աիդա» օպերան, որի վրա կծախսվի 100 մլն դրամ (266 600 դոլար):

Գարնան ամիսներին երեք նոր պրեմիերա կներկայացնի նաև Գ. Սունդուկյանի անվան ազգային ակադեմիական թատրոնը: Դրանք կլինեն 2009 թ. նախատեսված, բայց այդպես էլ հանդիսատեսին չներկայացրած գործերը` «Մեղրը», «Լեգենդ Մակբեթի մասին» ու ևս մեկ ներկայացում` նվիրված աշխարհահռչակ նկարիչ Գոյային:

«Այս ներկայացումների բեմադրությունն ուշացավ, քանի որ անցյալ տարի մահացավ թատրոնի գլխավոր նկարիչը: Բայց այս տարի մենք կունենանք նաև մեկ ժամանակակից ու մեկ դասական նոր ներկայացում»,- հավաստիացրեց թատրոնի տնօրեն Ստեփան Դավթյանը:

Լրագրողների այն հարցին, թե ինչո´ւ թատրոնն անցյալ տարվանից չունի գեղարվեստական ղեկավար, Դավթյանը պատասխանեց, որ իրենք միաձայն առաջարկում են Արմեն Էլբակյանի թեկնածությունը:

ՀՀ մշակույթի նախարարությունը այս հարցի առնչությամբ դեռ որոշում չի կայացրել: