Հրատապ ընթացակարգով Հայաստանի խորհրդարանը ճնշող մեծամասնությամբ (70 կողմ, 4 դեմ) ընդունեց «Միջազգային պայմանագրերի մասին» օրենքում փոփոխություններ և լրացումներ կատարելու մասին օրինագիծը, որը կարելի է դիտել որպես հայ-թուրքական արձանագրություններին առնչվող գործընթացից դուրս գալու նախապես մշակված քաղաքականություն:

Այս օրինագծի ընդունումը հիմնականում առնչվում է Հայաստանի և Թուրքիայի միջև դիվանագիտական հարաբերություններ հաստատելու վերաբերյալ Ցյուրիխյան արձանագրություններին և նախատեսում է հնարավորություն կասեցնել և չեղյալ համարել ստորագրված միջազգային պայմանագրերը մինչև դրանց ուժի մեջ մտնելը։

Օրինագծին դեմ է քվեարկել միայն ընդդիմադիր «Ժառանգություն» խմբակցությունը:

«Փաստաթուղթը կիսատ-պռատ է, իսկ մենք կիսատ փաստաթղթերի համար չենք քվեարկում»,- հայտարարեց «Ժառանգություն» խմբակցության ղեկավար Ստեփան Սաֆարյանը։

ՀՅԴ խմբակցությունը, որն առաջին ընթերցման ժամանակ կողմ էր քվեարկել, վերջնական քվեարկությանը չմասնակցեց` ի նշան բողոքի, քանի որ չէին ընդունվել իրենց ներկայացրած առաջարկությունները:

«Մենք` որպես արձանագրություններին «ոչ» ասող կուսակցություն, այս օրինագծին կողմ էինք, սակայն այն պետք է ավելի ընդլայնվեր, և առավել ամբողջական կլիներ, եթե ընդունվեին մեր առաջարկությունները»,- «ԱրմենիաՆաուին» ասում է ՀՅԴ պատգամավոր Արմեն Ռուստամյանը:

Դաշնակցությունն առաջարկում էր օրինագծում ամրագրել դրույթ, որով միջազգային պայմանագրերի ստորագրման և վավերացման գործընթացը կասեցնելու իրավասությամբ օժտված լինի ոչ միայն գործադիրը (կառավարությունը), այլ նաև օրենսդիր (Ազգային ժողովը) իշխանությունը, պահանջում էին նաև, որ օրենսդիրը պայմանագրերը վավերացնելիս վերապահումներ անելու իրավունք ստանար:

Օրենքի հապշտապ ընդունումը փորձագետները պայմանավորում են նախագահ Սերժ Սարգսյանի այն հայտարարությամբ, թե Հայաստանը շարունակելու է հայ-թուրքական հարաբերությունների գործընթացը, սակայն պատրաստելու է օրենքում համապատասխան փոփոխություններ, որպեսզի անհրաժեշտության դեպքում Հայաստանը դուրս գա հայ-թուրքական գործընթացից։