Երկու տարի առաջ այս օրը` 2008 թ. մարտի 1-ին, ընդդիմության աջակիցների և ոստիկանության միջև տեղի ունեցան նորանկախ Հայաստանի պատմության մեջ ամենաարյունալի հետընտրական բախումները, որին զոհ դարձան 10 երիտասարդներ, իսկ շատերը վիրավորվեցին:

Այսօր ընդդիմությունը Մատենադարանի մոտ անցկացնելու է մարտիմեկյան զոհերի հիշատակին նվիրված հանրահավաք Հայ ազգային կոնգրեսի ղեկավար Լևոն Տեր-Պետրոսյանի գլխավորությամբ:

Նախատեսվող հանրահավաքի պատճառով Երևան տանող բոլոր ճանապարհները ոստիկանության խիստ վերահսկողության տակ են, իսկ ավտոբուսների մուտքը մայրաքաղաք արգելված է:

«Իշխանությունները հնարավորինս փորձում են խոչընդոտել,- «ԱրմենիաՆաուին» ասում է ՀԱԿ-ի ներկայացուցիչ Վլադիմիր Կարապետյանը: - Դեռ անցյալ շաբաթվա ընթացքում մարզերի բնակիչներից ստանում էինք ահազանգեր, որ մեր համախոհներին կանչում են ոստիկանություն «բացատրական զրույցների», որոնց ընթացքում հորդորում են չմասնակցել հանրահավաքին»:

Վերջին երկու տարվա ընթացքում Եվրախորհրդի խորհրդարանական վեհաժողովը (ԵԽԽՎ) Հայաստանի վերաբերյալ ընդունեց 4 բանաձև` պահանջելով պատշաճ հետաքննություն անցկացնել և բացահայտել սպանությունների մեղավորներին, սակայն դեռ որևէ մեկը պատասխանատվության չի ենթարկվել:

Ուրբաթ (փետրվարի 26-ին) մարտի 1-ի զոհերի ծնողները նամակով դիմել են ԵԽԽՎ մշտական և մոնիթորինգի հանձնաժողովների անդամներին` հորդորելով առավել անաչառ վերաբերմունք ցուցաբերել Հայաստանի հարցը քննելիս` շեշտելով, որ դժգոհ են Հայաստանի համազեկուցողներ Ջոն Պրեսկոտի ու Ժորժ Կոլոմբիեի աշխատանքից, որոնց «անգործության և անտարբերության պատճառով ՀՀ իշխանությունները հրապարակավ սկսեցին հայտարարել, թե մարտի 1-ի էջը փակված է…»:

«Ի~նչ խղճով են փակում մարտի 1-ի էջը, եթե մեր որդիների սպանության համար որևէ մեկը պատասխանատվություն չի կրել, անգամ այն չորս ոստիկանները («Չերյոմուխա 7» հատուկ միջոցը կիրառած ոստիկանները, որի զոհ է դարձել 3 մարդ), որոնց մեղավորությունը հաստատել են անգամ իշխանությունները, չեն պատժվել»,- «ԱրմենիաՆաուին» ասում է մարտի 1-ի զոհ 23-ամյա Տիգրան Խաչատրյանի մայրը` Ալլա Հովհաննիսյանը: