Մարտի 2-ին մեկնարկեց արդեն երրորդ տարին անցկացվող «Թատրոն-X» թատերական փառատոնը, որն այս տարի առանձնանում է մասնակից թատրոնների թվով:

Փառատոնն անցկացվելու է մինչև մարտի 28-ը, որի շրջանակներում յուրաքանչյուր ներկայացումից հետո հրապարակային քննարկումներ են տեղի ունենալու ասպարեզի առաջատար մասնագետների, լրագրողների և հանդիսատեսի մասնակցությամբ: Այս տարի փառատոնին կմասնակցեն 25 թատրոններ 26 ներկայացումներով: Անցյալ տարի փառատոնին մասնակցել է 16, իսկ 2008-ին` 8 թատրոն:

Ըստ փառատոնի գեղարվեստական ղեկավար Ռուբեն Բաբայանի` այս տարի փառատոնին մասնակցում են թատրոն ունեցող բոլոր մարզերը (Հայաստանի վեց մարզերը, ինչպես նաև Շուշի քաղաքի թատերախումբը ԼՂՀ-ից):

«Քանի որ մայրաքաղաքի և մարզերի մշակութային կյանքի միջև բավական մեծ տարբերություն կա, այդ իսկ պատճառով մենք մարզային թատրոնները չենք բերում Երևան, այնպես որ, փառատոնը կանցկացվի նաև մարզերում»,- ասում է «Թատրոն-X» փառատոնի նախագահ Խզմալյանը:

Փառատոնի հովանավորը «Գագիկ Ծառուկյան» բարեգործական հիմնադրամն է, որը երեք մրցանակ է սահմանել լավագույն թատրոնների համար` համապատասխանաբար 1 մլն, 500 հազար և 300 հազար դրամ (մոտ 2500, 1300 և 780 դոլար):

Փառատոնի ժամանակ կներկայացվեն Հայաստանում մեծ ժողովրդականություն վայելող այնպիսի ներկայացումներ, ինչպիսիք են Երևանի տիկնիկային թատրոնում Նարեկ Դուրյանի բեմադրած «Սե Լա Վի», Երևանի կամերային թատրոնի «Կարևոր չէ՞` ում հետ» և այլ ներկայացումներ: