Ընդդիմությունը պատրաստվում է դատի տալ «Հայռուսգազարդ» ընկերությանը (Ռուսաստանի «Գազպրոմի» դուստր ձեռնարկությունը)` գազի սակագների «աննախադեպ ու անհիմն բարձրացման» համար, քանի որ սակագնի 37,5 տոկոսով բարձրացումը, ըստ արմատական ընդդիմադիր Հայ ազգային կոնգրեսի, «կարող է վերջին կաթիլը լինել` բնակչությանը մատնելու վերջնական սնանկացման»:

ՀԱԿ-ը հասարակությանը կոչ է անում չհամակերպվել «այդ անօրինական բարձրացման հետ» և, որպես համահայցվոր, դիմել դատարան՝ «վիճարկելու որոշման (գազի սակագների բարձրացման) ընդունման իրավական և տնտեսական ապօրինի հիմքերը»։

«Հայռուսգազարդի» (որն ունի մենաշնորհային դիրք Հայաստանում) սակագների բարձրացման հայտը Հանրային ծառայությունները կարգավորող հանձնաժողովը հաստատել էր անցյալ շաբաթվա վերջին (ըստ այդմ` ապրիլի 1-ից մոտ կես միլիոն սպառողներ 1000 խմ գազի համար կվճարեն 132 000 դրամ (347 դոլար)` նախկին 96000 դրամի (252 դոլար) փոխարեն (ձմռան ամիսներին ամսական միջին ծախսը կբարձրանա 10 000 դրամով (26 դոլար):

Ընդդիմությունը պնդում է, որ բարձրացումը տնտեսապես հիմնավորված չէ, և «Հայռուսգազարդը» գերշահույթներ է ստանում:

«Անհրաժեշտ է ստուգել «Հայռուսգազարդի» ծախսերի հիմնավորվածությունը, ղեկավար անձնակազմի աշխատավարձերի չափը, ֆինանսական միջոցների տնօրինումը»,- «ԱրմենիաՆաուին» ասում է ՀԱԿ-ի մամլո խոսնակ Արման Մուսինյանը:

Նա ասաց, որ իրենք ուսումնասիրել են «Հայռուսգազարդի» 2010-2011 թթ. ներդրումային ծրագիրը և պարզել, որ այն չափազանց «ուռճացված է ու հանգիստ հնարավոր է կրճատել»:

Նախկին վարչապետ Հրանտ Բագրատյանն էլ վստահեցնում է, թե պետք է պահանջատեր լինել, քանի որ «Հայռուսգազարդը» պետական կազմակերպություն է, և բաժնետոմսերի 20 տոկոսը դեռևս պատկանում է ՀՀ-ին։

«Շատ կարևոր է իմանալ, թե ինչքա՞ն են «Հայռուսգազարդի» ծախսերը։ Մի քանի շաբաթ առաջ «Հայռուսգազարդի» ղեկավարը Լոնդոնում մասնակցել է մի «բուրժուական» միջոցառման (նկատի ունի փետրվարի 11-ին արքայազն Չարլզի կազմակերպած ընդունելությունը), որտեղ ամեն մասնակից տվել է 25 000 ֆունտ ստեռլինգ»,- ասում է Բագրատյանը:

«Սա պետական հիմնարկ է, նա մեզ հարցրե՞լ է` մենք ուզո՞ւմ ենք, որ մեր վճարած գումարով նա մասնակցի բուրժուական միջոցառումների ու հետո էլ բերի այդ ծախսերը մտցնի սակագնի մեջ»,- հարցնում է Բագրատյանը:

Մինչդեռ «Հայռուսգազարդի» հասարակայնության հետ կապերի ղեկավար Շուշան Սարդարյանը Բագրատյանի հայտարարությունը համարում է «անհեթեթ»:

«Դա («Հայռուսգազարդի» ղեկավարի մասնակցությունը Լոնդոնում կայացած ընդունելությանը) չի համապատասխանում իրականությանը, և այդ հայտարարությունը պարզապես անհեթեթություն է»,- «ԱրմենիաՆաուին» ասում է Սարդարյանը: