Հանրային խորհրդի (նախագահի հրամանագրով ստեղծված մարմին, որում ընդգրկված են երկրի առաջատար հասարակական գործիչներ և մտավորականներ) անդամներն ասում են, որ թեև խորհուրդը կարողացել է անդրադառնալ հասարակական առավել մեծ հնչեղություն ստացած խնդիրներին, սակայն եղել են կարևոր խնդիրներ, որ բաց են թողնվել:

«Գոյության մեկ տարվա ընթացքում Հանրային խորհուրդը կառուցվածքային առումով կայացել է, իսկ բովանդակային առումով կայացման ճանապարհին է»,- ասում է Ֆրանսիական համալսարանի իրավաբանական ֆակուլտետի դեկան, Հանրային խորհրդի պետաիրավական հարցերի հանձնաժողովի նախագահ Գրիգոր Բադիրյանը:

ՀՀ նախագահ Սերժ Սարգսյանը խորհրդակցական մարմնի կարգավիճակով Հանրային խորհուրդը ստեղծելու հրամանագիրը ստորագրել էր դեռ 2008-ի հունիսին, իսկ 2009-ի մարտի 11-ին նախագահը հաստատեց Հանրային խորհրդի կանոնադրությունը և նշանակեց խորհրդի 12 անդամներին: Այնուհետև ընտրվեցին խորհրդի մյուս 24 անդամները, որոնք գիտության, արվեստի, բիզնեսի, հասարակական կազմակերպությունների հայտնի ներկայացուցիչներ են: Այժմ խորհուրդն ունի 12 հանձնաժողով՝ 66 ենթահանձնաժողովներով: Մեկ տարվա ընթացքում Հանրային խորհրդին 400 դիմում-բողոք ու մոտ 100 առաջարկություն է հասցեագրվել։

Հանրային խորհուրդն այս մեկ տարվա ընթացքում զգալի քննադատության արժանացավ մամուլում և առցանց միջավայրում: Քննադատության մի մասը վերաբերում էր խորհրդի նախագահ Վազգեն Մանուկյանին, որը 2008-ի նախագահական ընտրություններում Սերժ Սարգսյանի հակառակորդներից մեկն էր և հանդես էր եկել Սարգսյանի հասցեին լուրջ քննադատությամբ: Ոմանք էլ Հանրային խորհուրդը որակեցին որպես նախագահի ստեղծած [թոշակառու քաղաքական գործիչների] ակումբ, որի անդամները երկար ժամանակ «երազում էին ունենալ գրասենյակային մեծ սեղան ու քարտուղարուհի» (Democrat անունով հայ բլոգերի բնորոշմամբ):

Խորհրդի անդամները, սակայն, ասում են, որ գործունեության մեկ տարին ապացուցում է, որ խորհուրդը շատ հետաքրքիր գործիք է հանրային հետաքրքրություն ներկայացնող հարցերը վեր հանելու համար: Ըստ խորհրդի անդամ Աստղիկ Գևորգյանի, որը նաև Ժուռնալիստների միության նախագահն է, մեկ տարվա ընթացքում այն ունեցել է ակտիվ շնչառություն, զբաղվել կարևոր խնդիրներով ու գտել որոշակի հանգուցալուծումներ դրանց համար (համաներումը, բնապահպանական խնդիրներ, հեռուստաեթերի որակի բարձրացումը, լրագրողների մասնագիտական վարքականոնի հարցը և այլն):

«Չկա հարց, որը մերը չէ, հանրությանը հուզող բոլոր հարցերը նաև մեզ են վերաբերում»,- համոզված է Գևորգյանը:

Գևորգյանը նաև ասում է, որ խորհուրդը շատ ազատ է և երբեք չի վարանում խնդիրների վերաբերյալ սուր բնորոշումներով դիմել ՀՀ նախագահին:

Խորհրդի անդամ, «Սինոպսիս Արմենիա» ընկերության գործադիր տնօրեն Հովիկ Մուսայելյանն էլ խորհրդի կարևոր ձեռքբերումներից է համարում խորհրդի առաջարկությամբ հեռուստառադիոեթերի չափորոշիչների ընդունումը Հեռուստատեսության և ռադիոյի ազգային հանձնաժողովի կողմից:

«Թե այս գործընթացը վերջնարդյունքում ինչի´ կհանգի, այս պահին դժվար է ասել, բայց բոլորս ենք տեսնում, որ եթերում արդեն դրական տեղաշարժ կա»,- հավելում է փորձառու լրագրող Գևորգյանը: Մուսայելյանն էլ տեղեկացրեց, որ խորհուրդը երկու օրից աշխատանքներ է սկսելու Հանրային ծառայությունները կարգավորող հանձնաժողովի հետ ինտերնետը բնակչության համար ավելի հասանելի դարձնելու ծրագրի վրա:

«Մենք մեկ ամիս հանձնաժողովի հետ կաշխատենք և կփորձենք վեր հանել այն բոլոր խնդիրները, խոչընդոտները, որոնք խանգարում են ինտերնետ հասանելիությանը և, ընդհանրապես, տեղեկատվական տեխնոլոգիաների զարգացմանը մեր երկրում»,- ասաց Մուսայելյանը: