Թուրքիայի վարչապետ Ռեջեփ Թայիփ Էրդողանը մարտի 16-ին Լոնդոնում BBC հեռուստառադիոկայանին տված հարցազրույցում երկրորդ անգամ հայտարարել է, թե Հայաստանը պետք է ազատվի սփյուռքի «կախվածությունից» և սպառնացել, որ ցանկացած պահի կարող է Թուրքիայից վտարել հայ անօրինական միգրանտներին:

«Տեսեք` իմ երկրում 170 հազար հայ կա, որոնցից 70 հազարն իմ քաղաքացիներն են: Սակայն մյուս 100 000-ի վրա մենք աչք ենք փակում: Իսկ վաղը, եթե հարկ լինի` այդ 100 000-ին էլ կասեմ` գնացե´ք ձեր երկիր»,- ասել է Էրդողանը:

Մինչդեռ հենց մարտի 15-ին հայերին վտարելու պահանջով հանդես էր եկել Թուրքիայի Ժողովրդահանրապետական ընդդիմադիր կուսակցության անդամ պատգամավոր Ջանան Արըթմանը:

Սակայն արտգործնախարար Ահմեդ Դավութօղլուն, հակադարձելով Արըթմանին և Էրդողանին, ասել է, թե այդ քայլը չի բխում Թուրքիայի շահերից:

«Թուրքիայում ապօրինի բնակվող Հայաստանի քաղաքացիների վտարումը հաղթաթուղթ կդառնա մեր դեմ հանդես եկող երկրների ձեռքին, աշխարհի բոլոր երկրների թերթերը կհրապարակեն վտարվող հայերի մասին նյութեր: Կձևավորվի ցեղապաշտական պատկեր, Թուրքիան ավելի դժվարին իրավիճակում կհայտնվի»,- հայտարարել է Դավութօղլուն:

Այս անգամ էրդողանը, որը Մեծ Բրիտանիայի վարչապետ Գորդոն Բրաունի հրավերով պաշտոնական այցով գտնվում է Լոնդոնում, հայտարարել է, թե հարաբերությունների կարգավորման գործընթացը ձախողվում է Հայաստանի պատճառով:

«Հայաստանի հետ հարաբերություններում խնդիրներն առաջանում են ոչ թե մեր, այլ հայկական կողմի պատճառով։ Հայաստանը պետք է ընդունի կարևոր որոշում։ Արժե, որ Հայաստանն ազատվի սփյուռքի հիփոթեքից»,- ասել է Էրդողանը։

Երևանում այս խոսքերից զայրացած որոշ խմբեր կոչ են անում իշխանություններին արժանի հակահարված տալ Էրդողանին:

«Պետք է հստակ նոտա ուղարկվի և նրանց (Թուրքիային) պարզաբանվի, որ սփյուռքն ու Հայաստանը նույն ազգն են, և այդ սփյուռքը ձևավորվել է նրանց (թուրքերի) ոճրագործության հետևանքով: Ես զայրանում եմ ոչ այնքան Էրդողանի խոսքերից, որքան մերոնց լռությունից»,- «ԱրմենիաՆաուին» ասում է Երիտասարդական միության անդամ Մարինե Մինասյանը: