Photo: www.president.am
Նախագահ Սարգսյանը Քրեյգ Բարրեթին մրցանակ հանձնելիս:
Նպատակ ունենալով Հայաստանի երիտասարդության ուշադրությունը հրավիրել տեղեկատվական տեխնոլոգիաների վրա` ՀՀ նախագահ Սերժ Սարգսյանը ՏՏ ոլորտում համաշխարհային ներդրման համար 2009 թ. իր մրցանակը շնորհեց «Ինտել» կորպորացիայի տնօրենների խորհրդի նախկին նախագահին:
Երկուշաբթի մրցանակի հանձնման արարողության ժամանակ ՀՀ նախագահը «Ինտել» կորպորացիայի տնօրենների խորհրդի նախկին նախագահ և նախկին գործադիր տնօրեն Քրեյգ Բարրեթին բնորոշեց որպես մի «մարդու, ով միշտ կարողացել է առաջ նայել ու պնդել, որ ապագան գիտելիքինն է»:
Նախագահի մամլո գրասենյակի փոխանցմամբ` Սարգսյանն ասել է. «Այս մրցանակը Հայաստանի Հանրապետության համեստ ներդրումն է համաշխարհային մակարդակով տեղեկատվական տեխնոլոգիաների զարգացման գործում»: Բարրեթն առաջինն է, ով արժանացել է վերջերս հիմնված նախագահի մրցանակին:
«Այս մրցանակի ստեղծման ամենակարևոր նպատակը տեղեկատվական տեխնոլոգիաների հանդեպ Հայաստանի երիտասարդության ուշադրությունը հրավիրելն է: Մենք խրախուսելու ենք նրանց ուսումն ու աշխատանքն այս ոլորտում, որոնելու և գտնելու ենք դրա համար անհրաժեշտ նոր ուղիներ և միջոցներ: Այսօր, պարոն Բարրեթի ներկայությամբ, մեկ անգամ ևս մեր երիտասարդներին ուղերձ ենք հղում այն մասին, որ ապագան գիտելիքով, բարությամբ ու ստեղծագործելու հմտությամբ օժտված մարդունն է, ով ապավինում է մտքի ուժին ու տիրապետում լուծումներ գտնելու արվեստին»,-ասել է Սարգսյանը:
Իր խոսքում Սարգսյանը Բարրեթին բնորոշել է որպես մի մարդ, որը «չի սահմանափակվել զուտ տեղեկատվական տեխնոլոգիաների ոլորտով: Նա աշխուժորեն ներգրավվել է իր հարազատ երկրի` Ամերիկայի Միացյալ Նահանգների մի շարք ազգային ծրագրերի իրականացման գործում»,- ասել է Սարգսյանը` ցանկանալով, որ մյուս գործարարներն էլ հետևեն Բարրեթի օրինակին:
Տեղեկատվական տեխնոլոգիաների ոլորտում համաշխարհային ներդրման համար Հայաստանի նախագահի մրցանակը հիմնվել է Սերժ Սարգսյանի 2009 թվականի հուլիսի 6-ի հրամանագրով` նպատակ ունենալով խրախուսելու այս ոլորտի զարգացումը: Մրցանակը բաղկացած է Հայաստանը և բարձր տեխնոլոգիաները խորհրդանշող ոսկե ադամանդակուռ մեդալից, հավաստագրից և խորհրդանշական արձանիկից:
Մրցանակաբաշխության ֆինանսավորումը կատարվում է «Հայաստան» համահայկական հիմնադրամի, «Սինոփսիս Արմենիա» ՓԲԸ-ի և հովանավորի միջև կնքված համագործակցության հուշագրի համաձայն:
2009 թ. ֆինանսավորումն իրականացվում է «ՎիվաՍել-ՄՏՍ»-ի կողմից` «Հայաստան» համահայկական հիմնադրամի միջոցով:
English
Հայերեն
back to top 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.