ՀՀՇ վարչության նորընտիր նախագահ Արամ Մանուկյանը մամուլի ասուլիսի ժամանակ հայտարարել է, որ աջակցում է ՀՀ առաջին նախագահ Լևոն Տեր-Պետրոսյանի այն հայտարարությանը, որ Հայաստանի զարգացումն ու անվտանգությունը անմիջականորեն կախված են Լեռնային Ղարաբաղի հիմնախնդրի լուծումից և հայ-թուրքական հարաբերությունների կարգավորումից:

Հուլիսի 17-ին կառավարության նիստերի դահլիճում Հայոց համազգային շարժման հերթական համագումարի ժամանակ Մանուկյանը Լևոն Տեր-Պետրոսյանի հայտարարությունը չի համարում էապես տարբեր 2007-ին նույն Լևոն Տեր-Պետրոսյանի հայտարարությունից: Սակայն քննադատները պնդում են, որ իր 2007 թ. ելույթում Տեր-Պետրոսյանն ասել է ճիշտ հակառակը, որ Հայաստանի ներքին խնդիրները լուծելով միայն կարելի է հասնել Լեռնային Ղարաբաղի հիմնախնդրի և հայ-թուրքական հարաբերությունների կարգավորմանը:

«Նրա (Լևոն Տեր-Պետրոսյանի) առաջարկն այն է, որ ներկա իշխանությունը փոխելով, լեգիտիմ իշխանությամբ դեռևս կարելի է լուծել այդ երկու խնդիրները»,- ասում է Մանուկյանը:

Առաջին նախագահի վերջին հայտարարությունը, սակայն, բացասաբար է ընդունվել ինչպես իշխանական ճամբարի, այնպես էլ որոշ ընդդիմադիրների շրջանում: Օրինակ` դրան բացասական արձագանք է տվել ՀՀՇ վարչության անդամի թեկնածու առաջադրված Կարապետ Ռուբինյանը, որը չընտրվելուց հետո դադարեցրել է իր անդամակցությունը ՀՀՇ-ին:

Տարբեր քաղաքական գործիչներ նաև հայտարարում են, որ ՀՀՇ-ի ներսում անառողջ մթնոլորտ է տիրում, որը Մանուկյանը նորից ժխտում է` ասելով, որ իրենք լուրջ գործեր ունեն անելու` բարձրացնելու են քաղբանտարկյալների հարցը միջազգային ասպարեզում, ընդլայնելու են իրենց գործունեությունը Հայաստանում և աշխատելու են նոր երիտասարդներ ներգրավել իրենց շարքերում: