Երևանում, Հայաստանի մարզերում և Արցախում հուլիսի 22-29-ն անցկացվող «Մեկ ազգ, մեկ մշակույթ» 4-րդ մշակութային փառատոնի «Կատարողական արվեստի օրեր» միջոցառումների շարքն անցնում է մերթ սփյուռքից ժամանած մասնակիցների` փառատոնի վերաբերյալ գոհունակության արտահայտություններով, մերթ էլ դրա կազմակերպչական մակարդակի վերաբերյալ դժգոհություններով:

Փառատոնին մասնակցող որոշ երկրների պատվիրակություններ իրենց դժգոհությունն են հայտնել, որ փառատոնի մասին գովազդ չի իրականացվել, ինչը կարող էր միջոցառումների ժամանակ ավելի շատ հանդիսատես ներգրավել:

«Մեկ ազգ, մեկ մշակույթ» փառատոնն անցկացվում է 2004 թվականից` երկու տարին մեկ անգամ: Փառատոնի նպատակն է ամրապնդել Հայաստան-սփյուռք-Արցախ հոգևոր-մշակութային կապերը, ազգային մշակույթի պահպանման գործում ներգրավել սփյուռքի ստեղծագործող երիտասարդությանը, ինչպես նաև մշակութային ոլորտում հայտնաբերել համահայկական մասնագիտական ներուժ: Այս տարի փառատոնի կազմակերպիչները որոշել են փառատոնի շրջանակներում անցկացվող տարաբնույթ միջոցառումներն անցկացնել ամբողջ տարվա ընթացքում: Փառատոնի կազմակերպիչներն են ՀՀ սփյուռքի նախարարությունը և «Մեկ ազգ, մեկ մշակույթ» հիմնադրամը:

Այս տարի փառատոնի «Կատարողական արվեստի օրեր» միջոցառումների ցանկը շատ հագեցած է: Փառատոնի հասարակայնության հետ կապերի պատասխանատու Մարիետա Մակարյանն ասում է, որ Երևանում, մարզերում և Արցախում օրական 7-8 տարբեր միջոցառումներ են անցկացվում: Ամենամեծ պատվիրակություններ գալիս են սովորաբար Ռուսաստանից, Իրանից և Վրաստանից: Այս տարի փառատոնին շուրջ 18 երկրներից մասնակցում է 1200 մարդ, ընդ որում` շատ են պարախմբերը և երգչախմբերը:

«Մի համերգին մասնակցում են տարբեր երկրների ներկայացուցիչներ, նրանք, ուզեն թե չուզեն, իրար հետ շփվում են, հասցեներ փոխանակում, մտերմանում են, միասին շրջում, խանդավառություն կա մասնակիցների մեջ: Փառատոնի հիմնական նպատակը հայապահպանությունն է, և մենք դրան արդեն հասել ենք»,- ասում է Մակարյանը:

«Մեկ ազգ, մեկ մշակույթ» հիմնադրամի գործադիր տնօրեն Թամարա Պողոսյանը երեկ` հուլիսի 26-ին, Լիբանանից ժամանած պարախմբի ելույթից առաջ ասաց, որ փառատոնն արդեն կայացած իրողություն է:

«Այսօր մենք բոլորս միասին երջանկությամբ փաստում ենք, որ այս սերունդը ոչ միայն մեր մշակութային ժառանգության տերն է, այլև այդ ժառանգության կրողը: Այն ազգը, որ ունի այսպիսի հիշողություն, այսպիսի մշակույթ և այսպիսի համախմբվածություն, նրա բոլոր իղձերն իրականանալի են»,- ասաց Պողոսյանը:

Չնայած դրան ԱՄՆ-ից ժամանած դաշնակահար Հովիկ Քեոշկերյանի ուսուցիչ Հմայակ Հովհաննիսյանն «ԱրմենիաՆաուին» փոխանցեց, որ փառատոնի վերաբերյալ գովազդ չի արվել, և մարդկանց մեծ մասն անգամ տեղյակ չէ, որ նման միջոցառումների շարք է անցկացվում:

«Բացի այդ, չգիտենք` ո´ւր ենք գնալու, այսինքն` իմանում ենք, բայց միայն վերջին պահին»,- իր վրդովմունքը չթաքցրեց Հովհաննիսյանը` ավելացնելով, որ դեռ վաղ է խոսել փառատոնի գաղափարի իրականացման մասին:

Իրանից ժամանած «Արարատ» հայ մշակութային միության Արամայիս Աղամալյանի անվան թատերախմբի 12 հոգանոց թատերախմբի (թատերախումբը, որը երկրորդ անգամ է Հայաստանում, երեկ գրեթե կիսադատարկ դահլիճում ներկայացրեց ամերիկացի գրող Արթուր Միլլերի «Իմ բոլոր զավակները» պիեսը) գեղարվեստական ղեկավար Վահագն Ազիզյանը «ԱրմենիաՆաուին» ասաց, որ այս տարի փառատոնը իրենց ոչ մի արդյունք չի տվել:

«Հույս ունեի, որ գոնե էսօր հանդիսատես կունենանք, որովհետև երկու օր առաջ էլ խաղացինք, հանդիսատես չկար»,- ասում է Ազիզյանը` ավելացնելով, որ իրենց համար ոչ մի գովազդ չի արվել, ինչը կազմակերպիչների պարտականությունը պետք է լիներ:

Ազիզյանը պատրաստվում է իր նկատառումները նամակով փոխանցել փառատոնի կազմակերպիչներին:

«Մեզ համար երազանք է գալ Երևան և որևէ դահլիճում խաղալ, բայց հիմա ի՞նչ: Ներկայացմանը իմ թեհրանահայ ծանոթներն էին եկել, նրանք, ովքեր այստեղ են ապրում կամ էլ եկել են այստեղ հանգստանալու»,- հավելեց նա: