Հայ երաժշտարվեստը մեծ կորուստ ունեցավ` հուլիսի 28-ին Մոսկվայում, 61 տարեկան հասակում կյանքից հեռացավ հայ օպերային անվանի երգչուհի Արաքս Դավթյանը: Երևանի Կոմիտասի անվան պետական կոնսերվատորիայի շրջանավարտը 1986 թվականին Ռուսաստանի պետական ակադեմիական մեծ թատրոնի կողմից աշխատանքի հրավեր է ստանում:

Աշխարհի ավելի քան 120 հեղինակավոր համերգասրահների, այդ թվում` Նյու Յորքի «Կարնեգի հոլի», Փարիզի «Գավոյի», Ամստերդամի «Գեբաուի», Տոկիոյի «Սենթեր հոլի» հանդիսատեսներն առիթ են ունեցել ըմբոշխնելու Դավթյանի քնարական սոպրանոն: Հիշարժան է նրա հատկապես 1988 թվականի ելույթը «Գեբաուում», ուր կատարել է Ջուզեպպե Վերդիի «Ռեքվիեմը»:

Արաքս Դավթյանը համերգներով հանդես է եկել աշխարհի տարբեր ծայրերում` ներկայացնելով երգարվեստի բացառիկ գլուխգործոցներ: Աշխարհահռչակ ջութակահար, դիրիժոր մաեստրո Վլադիմիր Սպիվակովի գնահատմամբ` Դավթյանը Մոցարտի ստեղծագործությունների լավագույն մեկնաբաններից մեկն է ողջ աշխարհում:

Օպերային անզուգական երգչուհի լինելուց զատ, Դավթյանը նաև հրաշալի մանկավարժ էր. դասավանդել է Երևանում (1997 թվականից պետական կոնսերվատորիայում) և Մոսկվայում, ուր աշխատել է մինչև կյանքի վերջը:

Արաքս Դավթյանի աճյունը կամփոփվի Հայաստանում: Երգչուհու հուղարկավորության նպատակով Հայաստանի վարչապետի որոշմամբ ստեղծվել է պետական հանձնաժողով: