Եվրո-2012-ի որակավորման խաղերին ընդառաջ Հայաստանի ֆուտբոլի հավաքականը խաղացողների ավելի լայն ընտրության հնարավորություն ունի, որոնց թվում է նաև սփյուռքահայ հայտնի մի ֆուտբոլիստ: Եվրո-2012-ի շրջանակներում Հայաստանի ընտրանու առաջին հանդիպումը կկայանա ուրբաթ`Իռլանդիայի Հանրապետության հավաքականի հետ:

Երևանում տեղի ունենալիք խաղից հետո` սեպտեմբերի 7-ին, Հայաստանի հավաքականն արտագնա խաղում իր ուժերը կչափի Մակեդոնիայի ներկայացուցիչների հետ:

(2011 թ. աշնանը կայանալիք մրցաշարում Հայաստանի մյուս մրցակիցները կլինեն որակավորման B խմբում ընդգրկված Ռուսաստանի, Սլովակիայի և Անդորրայի հավաքականները:)

Գլխավոր մարզիչ Վարդան Մինասյանը հրապարակել է 28 թեկնածուների ցուցակը և առաջիկա խաղին ընդառաջ կկազմի 18 հոգուց բաղկացած ընտրանին:

Դանիայի բարձրագույն խմբի առաջնությանը մասնակցող «Ռենդերս» ակումբի հարձակվող 23-ամյա Յուրի Մովսիսյանը ամենայն հավանականությամբ կընդգրկվի մեկնարկային կազմում:

Ադրբեջանում ծնված ամերիկահայ ֆուտբոլիստն օգոստոսի 11-ին առաջին անգամ ընդամենը 15 րոպե խաղաց Հայաստանի ընտրանու կազմում` այդ կերպ պաշտոնապես դառնալով ազգային հավաքականի անդամ: Իրանի դեմ ընկերական հանդիպումն ավարտվեց 1:3` հօգուտ հյուրերի:

Մովսիսյանն ամենահայտնի ֆուտբոլիստներից է, որին Հայաստանի ֆուտբոլի ֆեդերացիան (ՀՖՖ) մինչ օրս ընտրել է: Նախքան ազգային հավաքականում իր առաջին մրցելույթը Մովսիսյանն ասել է, որ նախընտրել է խաղալ իր պատմական հայրենիքի ընտրանու կազմում` չնայած ԱՄՆ հավաքականում հանդես գալու հնարավոր հրավերի:

«Միշտ էլ հետաքրքրված եմ եղել Հայաստանի ազգային հավաքականում խաղալով…: Կարծում եմ` կկարողանամ ուժեղացնել Հայաստանի հավաքականը, և միասին կարող ենք լավ արդյունքների հասնել»,- ասել է ֆուտբոլիստը, որը դանիական ակումբում հայաստանցի պաշտպան Ռոբերտ Արզումանյանի թիմակիցն է:

Հայաստանի հավաքականի մարզիչ Մինասյանը և ՀՖՖ նախագահ Ռուբեն Հայրապետյանը նույնպես լավատեսորեն են տրամադրված և կարծում են, որ Մովսիսյանը կկարողանա օգնել Հայաստանին ավելի լավ արդյունքներ ցույց տալ միջազգային ասպարեզում: (Վերջին պաշտոնական մրցաշարում Հայաստանի ընտրանին իր հաշվին գրանցել է 1 հաղթանակ (Բելգիայի հավաքականի նկատմամբ), 1 ոչ-ոքի և 8 պարտություն:)

Փորձառու դարպասապահ Ռոման Բերեզովսկին հավանաբար Հայաստանի դարպասը պաշտպանող միակ հույսը կմնա մեկնարկելիք որակավորման մրցաշարում: 36-ամյա դարպասապահը, որը ներկայումս խաղում է Ռուսաստանի «Խիմկի» ֆուտբոլային ակումբի համար, նորից հրավիրվել է առաջիկա միջազգային մրցաշարում պաշտպանելու Հայաստանի ընտրանու դարպասը Իռլանդիայի Հանրապետության և Մակեդոնիայի դեմ խաղերում:

Հայաստանի հավաքականի երիտասարդ տաղանդավոր ֆուտբոլիստ Հենրիկ Մխիթարյանը, որը մի քանի միլիոնանոց տրանսֆերի գործարք է կնքել և Ուկրաինայի բարձրագույն խմբի առաջնության մասնակից Դոնեցկի «Մետալուրգից» տեղափոխվել է նույն քաղաքի ավելի հեղինակավոր թիմ` «Շախտյոր», հավանաբար նույնպես կընդգրկվի ազգային հավաքականի կազմում և հոլանդական «Այաքսի» նախկին հարձակվող Էդգար Մանուչարյանի հետ, որն այս մրցաշրջանի սկզբում վերադարձել է իր նախկին թիմ` «Փյունիկ», լարվածություն կստեղծի մրցակցի տուգանային հրապարակի մատույցներում:

Մխիթարյանը, որը հանդես է գալիս հարձակվող կիսապաշտպանի կարգավիճակում, Իրանի հետ խաղին չմասնակցեց, քանի որ այլ հայազգի երիտասարդ խաղացողների, այդ թվում` «Փյունիկի» հարձակվող Հովհաննես Գոհարյանի հետ ընդգրկված էր մինչև 21 տարեկանների ազգային հավաքականում, որը նույն օրը մրցութային խաղ էր անցկացնում Վրաստանի ընտրանու դեմ:

(Հայաստանի մինչև 21 տարեկանների ազգային հավաքականը Եվրո-2011-ի որակավորման խաղերում իր վերջին հանդիպումը կանցկացնի սեպտեմբերի 7-ին Թբիլիսիում` Վրաստանի ընտրանու դեմ: Դանիացի մարզիչ Ֆլեմինգ Սերիցլևի սաներն անգամ տեսականորեն կորցրել են Եվրո-2011-ի որակավորման փուլը հաղթահարելու հնարավորությունը, թեև Հայաստանի երիտասարդ ներկայացուցիչները բավական լուրջ խաղամակարդակ են ցույց տվել ամբողջ մրցաշարի ընթացքում: Օգոստոսի 11-ին Երևանում Վրաստանի հավաքականի հետ լարված պայքարում Հայաստանի երիտասարդական ընտրանին, բաց թողնելով մի քանի գոլային հնարավորություններ, 2:3 հաշվով պարտվեց հյուրերին:)

Այս շաբաթից ազգային երկու հավաքականներն էլ առաջիկա հանդիպումներից առաջ հավաքներ և մարզումներ կանցկացնեն նորակառույց մարզաբազայում, որի շինարարությունը տևել է երեք տարի և իրականացվել է միջազգային ֆուտբոլի կառավարող մարմինների աջակցությամբ:

Անցյալ շաբաթվա վերջին հանդես գալով Հայաստանի հանրային հեռուստատեսությամբ` ՀՖՖ նախագահ Ռուբեն Հայրապետյանն ասաց, որ մայրաքաղաքի Ավան թաղամասում գտնվող մարզաբազան, որի բացման պաշտոնական արարողությունը տեղի կունենա սեպտեմբերի 1-ին, կօգնի Հայաստանի ազգային հավաքականներին ավելի լավ պայմաններում, տարվա ընթացքում գործնականում անվճար, անցկացնել իրենց մարզումները, այդ թվում` առաջիկա պաշտոնական հանդիպումներից առաջ:

Կենտրոնում գործում են նաև ֆուտբոլի երիտասարդական ակադեմիա և տեխնիկապես հագեցած ժամանակակից կենտրոն ազգային հավաքականների համար` մարզումների համար նախատեսված մի քանի մարզադաշտերով և սպորտի ու հանգստի համար այլ հարմարություններով:

Այն նաև լավ հնարավորություններ է ընձեռում այլ թիմային ու անհատական մարզաձևերի պարապմունքների, ինչպես նաև ֆուտբոլի մասսայականացման համար:

Նախատեսվում է, որ չորեքշաբթի կայանալիք բացման պաշտոնական արարողությանը կմասնակցեն նաև ՀՀ նախագահ Սերժ Սարգսյանը և ՈՒԵՖԱ-ի նախագահ Միշել Պլատինին: