ԵԱՏՄ անվտանգության համար. Սարգսյանը բարձրացնում է Ադրբեջանի ագրեսիայի հարցը նախկին խորհրդային պետությունների դաշինքի նիստում

Մայիսի 30-ին Սերժ Սարգսյանը Լյուքսեմբուրգում ներկա է եղել Եվրոպական ժողովրդական կուսակցության 40-ամյակի առթիվ հոբելյանական հանդիսություններին: Մայիսի 31-ին Սարգսյանն արդեն Ղազախստանի մայրաքաղաք Աստանայում էր, որտեղ անցկացվում էր Եվրասիական տնտեսական բարձրագույն խորհրդի նիստը:

Ո՛չ Լյուքսեմբուրգում, ո՛չ էլ Աստանայում Սերժ Սարգսյանը պաշտոնական երկկողմ հանդիպումներ չի ունեցել, թեև Աստանայում սպասվում էր Ռուսաստանի նախագահ Վլադիմիր Պուտինի հետ հանդիպում, որի հետ Սարգսյանն այդպես էլ չի հանդիպել Ղարաբաղում 2016 թ. ապրիլյան պատերազմից հետո:

Եվրասիական տնտեսական բարձրագույն խորհրդի նիստում Սարգսյանը հանդես է եկել հայտարարությամբ Ադրբեջանի ագրեսիայի կապակցությամբ` այդ երկրին սպառնալիք համարելով ԵԱՏՄ-ի անվտանգության և ներդրումների համար: «Ապրիլի սկզբին Լեռնային Ղարաբաղի հետ շփման գծում և Հայաստանի հետ սահմանին Ադրբեջանի կողմից իրադրության լարումը ԵԱՏՄ տարածաշրջանի անվտանգության համար լուրջ մարտահրավեր դարձավ: Վտանգն ակնհայտ է՝ կամ Եվրասիական տնտեսական միության տարածքը մեր միջազգային գործընկերների կողմից կդիտվի որպես տնտեսական զարգացման, կայունության և անվտանգության գոտի, որտեղ կարելի է ներդրումներ կատարել, որտեղ կարելի է երկարաժամկետ ծրագրեր նախաձեռնել, կամ բոլորը կընտելանան այս բարդ իրավիճակին և կառաջնորդվեն այն հանգամանքով, որ այստեղ լարվածության և երկպառակության մշտական օջախներ են: Չեմ կարծում, որ երկրորդ սցենարը բխում է մեր երկրների շահերից»,- ասել է Սերժ Սարգսյանը:

Սակայն ԵԱՏՄ պետությունների նախագահներից ոչ մեկը չարձագանքեց Սերժ Սարգսյանի ելույթին, և Ադրբեջանի մասին հարցը չընդգրկվեց նիստի ամփոփիչ հայտարարության մեջ: Ի դեպ, ոչ մի ամփոփիչ հայտարարություն էլ չեղավ, քանի որ նախագահները գրեթե ոչնչի մասին չպայմանավորվեցին: Նախագահ Նուրսուլթան Նազարբաևը կոչ արեց ԵԱՏՄ-ի արդյունավետության բարձրացման ուղիներ փնտրել միության գոյության երկու տարվա ընթացքում միության շրջանակներում առևտրաշրջանառության կտրուկ անկման պայմաններում:

Մինչդեռ Հայաստանում բուռն քննարկումներ են ծավալվել ԵԱՏՄ-ի արդյունավետության հարցի շուրջ: Պետական եկամուտների կոմիտեի նախագահի տեղակալ Արմեն Ալավերդյանը խորհրդարանում քննարկումների ժամանակ հայտարարել է, որ ԵԱՏՄ-ին անդամակցությունից հետո Հայաստանի հարկային եկամուտները զգալիորեն նվազել են: Ընդ որում, նա կասկածի տակ չի դրել ԵԱՏՄ-ի արդյունավետությունը, սակայն համառորեն արձանագրել է, որ Հայաստանը զգալի վնասներ է կրել միությանն անդամակցելուց:

Իսկ Լյուքսեմբուրգում Սերժ Սարգսյանը նշել է հայաստանյան կուսակցությունների, այդ թվում նաև` իր գլխավորած ՀՀԿ-ի, անդամակցության կարևորությունը Եվրոպական ժողովրդական կուսակցությանը: Նա հայտարարել է ժողովրդավարական եվրոպական արժեքների ընդհանրության մասին, որոնք բխում են քրիստոնեական ժառանգությունից, և նշել, որ Հայաստանը մտադիր է ԵՄ-ի հետ համապարփակ իրավական փաստաթուղթ ստորագրելու:

Մայիսի 30-ի և 31-ի Սերժ Սարգսյանի այցերը, հավանաբար, պետք է ընդգծեն հայաստանյան արտաքին քաղաքականության կոմպլեմենտարությունը, սակայն, ինչպես ասում են վերլուծաբանները, տպավորությունը միանգամայն այլ է: Սերժ Սարգսյանի արտաքին քաղաքականությունը հանգում է այն բանին, որ նա հավատացնում է Եվրոպային արժեքների ընդհանրության, հարաբերությունները խորացնելու մտադրության մասին, սակայն այդուհանդերձ միանում է Եվրասիական միությանը, որի անարդյունավետությունն այլևս ոչ ոք չի վիճարկում: Սա ծնում է Հայաստանի վարած արտաքին քաղաքականության և ազգային շահերին դրա համապատասխանության համարժեքության մասին հարցեր: