Ղարաբաղ. երկու հայ զինծառայողներ են զոհվել հրադադարի ռեժիմի վերջին խախտման հետևանքով

Երկու հայ զինծառայողներ են զոհվել Լեռնային Ղարաբաղում այս գիշեր, երբ ադրբեջանական ուժերը, ըստ հաղորդումների, շարունակել են խախտել կրակի դադարեցման մասին պայմանավորվածությունը:

Ըստ Լեռնային Ղարաբաղի պաշտպանության նախարարության` զոհվել են Տիգրան Պողոսյանը (ծնված 1992 թ.) և Արամ Առուշանյանը (ծնված 1972 թ.):

Հաղորդագրության մեջ նշվում է, որ ապրիլի 25-ին և լույս 26-ի գիշերը

ադրբեջանական զինված ուժերն օգտագործել են իրենց զինանոցում գտնվող գրեթե բոլոր տիպի հրետանային միջոցները և զրահատեխնիկա, մասնավորապես` ականանետներ, նռնականետներ, զենիթային կայանքներ, ռեակտիվ հրթիռային կայանքներ և տանկ:

Ադրբեջանական կողմը, բացի մարտական հենակետերից, ՄՄ-21 (Գրադ) կայանքից արկակոծման է ենթարկել Մարտակերտ բնակավայրը (14 արկ): Հրետանային կրակ է վարվել նաև Ղարաբաղի հյուսիսում գտնվող Մատաղիս գյուղի ուղղությամբ (8 արկ):

«Հակառակորդի ագրեսիվ գործողությունները չեզոքացնելու նպատակով ղարաբաղյան բանակը դիմել է կանխարգելիչ քայլերի և թիրախային հարվածներ հասցրել նրա առաջնային դիրքերին ու կրակային հենակետերին` պատճառելով կենդանի ուժի և զինտեխնիկայի նշանակալի կորուստներ»,- ասել է Լեռնային Ղարաբաղի պաշտպանության նախարարությունը: