Հայաստանի և Իրանի պաշտպանության նախարարները մտահոգություն են հայտնել Ղարաբաղում իրավիճակի վերաբերյալ

Photo: www.mil.am

Հայաստանի Հանրապետության պաշտպանության նախարար Սեյրան Օհանյանը և Իրանի Իսլամական Հանրապետության պաշտպանության և զինված ուժերի աջակցման նախարար Հոսեին Դեհղանը քննարկել են  վերջին օրերին իրավիճակի  լարվածությունը ղարաբաղա-ադրբեջանական զորքերի շփման գծում:

Հանդիպումը տեղի է ունեցել ապրիլի 27-ին Մոսկվայում անցկացվող անվտանգության հարցերով ամենամյա միջազգային համաժողովի  շրջանակներում:

Կողմերը մտահոգություն են հայտնել արցախա-ադրբեջանական ուժերի շփման գծում իրավիճակի սրման կապակցությամբ և կարևորել լարվածության թուլացման ու փոխվստահության մթնոլորտի հաստատման անհրաժեշտությունը:

Ի հավելումն դրա` երկուստեք նշվել է, որ ապրիլյան քառօրյա պատերազմի արդյունքները ևս մեկ անգամ ապացուցեցին արցախյան հակամարտության ռազմական լուծման անհնարինությունը:

Հանդիպման ընթացքում անդրադարձ է եղել նաև երկու երկրների պաշտպանական գերատեսչությունների միջև համագործակցության առկա վիճակին ու հետագա զարգացման հեռանկարներին առնչվող հարցերին:

Հիշեցնենք, որ ապրիլի 2-ից ղարաբաղա-ադրբեջանական զորքերի շփման գոտում ռազմական գործողությունների ակտիվացումից անմիջապես հետո Իրանի  արտգործնախարար Մոհամմադ Ջաֆադ Զարիֆը կոչ էր արել Լեռնային Ղարաբաղի հակամարտության կողմերին հակամարտությունը լուծել խաղաղ բանակցային ճանապարհով:

Հայաստանյան  իր գործընկերոջ  հետ տեղի ունեցած հեռախոսազրույցի ընթացքում վերջինս  ընդգծել էր կրակի դադարեցման և հակամարտությունը խաղաղ ճանապարհով կարգավորելու կարևորությունը, որը կվերադարձնի տարածաշրջանի հանդարտությունը։

Իրանի Հանրապետությունը նաև բազմիցս պաշտոնապես հայտարարել է միջնորդության պատրաստակամության մասին` հակամարտության լուծումը  ԵԱՀԿ Մինսկի խմբի ու միջազգային կազմակերպությունների շրջանակներում բանակցությունների միջոցով տեսնելով: