Տեր-Պետրոսյանը մեկնել է Ստեփանակերտ և հանդիպել ԼՂՀ ղեկավարի հետ

Հայաստանի առաջին նախագահ Լևոն Տեր-Պետրոսյանը Ստեփանակերտ այցի երկրորդ օրը հանդիպում է ունեցել Լեռնային Ղարաբաղի Հանրապետության (ԼՂՀ) նախագահ Բակո Սահակյանի հետ:

Ըստ ԼՂՀ նախագահի մամուլի ծառայության` «քննարկվել են ղարաբաղա-ադրբեջանական սահմանում ապրիլի 2-5-ը հակառակորդի կողմից սանձազերծված լայնածավալ պատերազմական գործողություններին վերաբերող մի շարք հարցեր»:

Ինչպես հաղորդվում է, նախագահ Սահակյանը կարևորել է «այս ծանր օրերին քաղաքական ուժերի ցուցաբերած միասնականությունը և նրանց դերակատարությունը մեր ժողովրդի առջև ծառացած խնդիրների լուծման գործում»:

Տեր-Պետրոսյանը, ով 1991-1998 թթ. եղել է Հայաստանի նախագահ, այժմ երկրի հիմնական ընդդիմադիր Հայ ազգային կոնգրես կուսակցության առաջնորդն է:

Անցյալ ամսվա սկզբին Լեռնային Ղարաբաղում իրավիճակի սրման պայմաններում Լևոն Տեր-Պետրոսյանը նախաձեռնել էր հանդիպում Հայաստանի գործող նախագահ Սերժ Սարգսյանի հետ, որի վարչակազմի սուր քննադատներից է նա 2008 թ.-ից:

Ապրիլի 9-ին Սարգսյանի հետ հանդիպումից հետո iLur.am կայքին տված հարցազրույցում Լևոն Տեր-Պետրոսյանը կոչ էր արել հայաստանյան ընդդիմությանը մի կողմ դնել տարաձայնությունները իշխանության հետ` Ադրբեջանի հետ կարևոր բանակցություններ սկսելուց առաջ:

Լեռնային Ղարաբաղում ակտիվ ռազմական գործողությունների ավարտից գրեթե մեկ ամիս անց, սակայն, Հայաստանի և Ադրբեջանի միջև առաջիկայում բանակցությունների վերսկսման նշաններ դեռ չկան:

Ստեփանակերտ Տեր-Պետրոսյանի այցի նախօրեին ՀԱԿ փոխնախագահ Լևոն Զուրաբյանն ասել է, որ Ադրբեջանի կողմից ռազմական սպառնալիքի պայմաններում այս այցելությունը միտված է ի ցույց դնելու ազգային միասնությունը: