Աղմուկ «կեղտոտ ռումբի» շուրջ. Հայաստանի «միջուկային հնարավորությունների» մասին խոսակցությունները Ադրբեջանում խուճապ են առաջացրել

Հայաստանում միջուկային զենքի հնարավոր առկայության մասին խոսակցությունները թեև պետական մակարդակով հերքվում են, սակայն արդեն հասցրել են հարևան պետությունում անհանգստության տեղիք տալ, իսկ Հայաստանն էլ միջազգային հանրության թիրախ դարձնել:

Օրերս Հայաստանի Ազգային ժողովի ընդդիմադիր պատգամավոր, Հայաստանի նախկին վարչապետ Հրանտ Բագրատյանը խորհրդարանական հայտարարությունների ժամին ասել էր, որ «Հայաստանը պետք է ստեղծի միջուկային զենք, հերիք ա, մենք մեզ պիտի պաշտպանենք»:

Միջուկային զենք ունենալու մասին ավելի վաղ խոսել էր գեներալ-մայոր, Արցախյան ազատամարտի հերոս, ՀՀ պաշտպանության նախկին փոխնախարար Արկադի Տեր-Թադևոսյանը՝ նույն ինքը Կոմանդոսը:

Այս խոսակցություններն արդեն իսկ իրական խուճապ են առաջացրել Ադրբեջանում, անգամ լուրջ բանավեճեր են ծավալվում տեղեկատվական տարբեր հարթակներում` արդյոք ունա՞կ է Հայաստանն իր գիտական ու արդյունաբերական ներուժով միջուկային զենք ստեղծելու: Ադրբեջանցիներն առաջ են բերում այն վարկածը, որ Հայաստանում հնարավոր է լինի այսպես կոչված «կեղտոտ ռումբ»:

«Կեղտոտ ռումբը նույնպիսի զանգվածային ոչնչացման զենք է, որում օգտագործվում են ռադիոակտիվ ճառագայթող նյութեր, զենքն արտադրվում է ռադիոակտիվ նյութերի բազայի վրա»,- գրում են ադրբեջանական լրատվամիջոցները՝ շահարկելով ընդհուպ Մեծամորի ատոմակայանը փակելու հարցը:

Ադրբեջանն անհանգստացնող այս հարցը հասցրել է նույնիսկ միջազգային հանրությանը ներկայացնել, և ռուսաստանյան թերթերը տեղեկացնում են, որ չորեքշաբթի Եվրամիության դիվանագիտության ղեկավարի պաշտոնական ներկայացուցիչը, մեկնաբանելով Հայաստանի՝ միջուկային զենք ունենալու մասին լրատվամիջոցներում շրջանառվող տեղեկությունները, նշել է, որ «դա պետք է ստուգի»:

Հատկանշական է, որ Բագրատյանի խոսքերը չի հերքել նաև Հայաստանում իշխող Հանրապետական կուսակցության հետ համագործակցող Հայ հեղափոխական դաշնակցություն խմբակցության ղեկավար Արմեն Ռուստամյանը՝ չորեքշաբթի լրագրողների հետ զրույցում լիովին հնարավոր է համարելով, որ Հայաստանը վաղուց կարող է ունենալ ատոմային ռումբ:

«Ամեն դեպքում մենք միջուկային գերտերության մաս ենք եղել: Հայտնի չէ, թե ինչպես է այն բաշխվել, այստեղ շատ մութ պատմություններ կան»,- ասել է Ռուստամյանը՝ հավելելով, որ Ադրբեջանը նախքան մեծ աղմուկ բարձրացնելը պետք է մտածի իր գերսպառազինության ու դրա վտանգների մասին, իսկ միջազգային հանրությանն էլ կոչ է արել սանձել Թուրքիայի և Ադրբեջանի ագրեսիվ գործողությունները:

Սակայն միջուկային զենք ունենալու մասին բոլոր «հույսերը» ի դերև է հանել Հայաստանի ԱԺ փոխնախագահ Էդուարդ Շարմազանովը, նշելով, որ Հայաստանը խաղաղ նպատակներով` էլեկտրաէներգիա արտադրելու համար է օգտագործում ատոմային էլեկտրակայանը, և Հայաստանի իշխանությունները մտադիր չեն միջուկային զենք ստեղծել:

«Հայաստանից որևէ սպառնալիք չի բխում, քանի որ մենք խաղաղասեր երկիր ենք: Եթե ինչ-որ մեկը փորձում է տարածաշրջանում գտնել սպառնալիքներ, ապա պետք է իր հայացքը սևեռի Թուրքիայի և Ադրբեջանի ուղղությամբ ու դեպի հարավ` «Իսլամական պետություն»,– չորեքշաբթի լրագրողների հետ զրույցում ասել է Շարմազանովը` նշելով, որ Բագրատյանի խոսքերը պատգամավորի անձնական կարծիքն են:

Ըստ քաղաքագետ, «Կովկաս» ինստիտուտի փոխտնօրեն Սերգեյ Մինասյանի՝ Բագրատյանի հայտարարություններն այս պահին այնքան էլ տեղին չեն:

«Կա քաղաքական մեկնաբանության և քաղաքական պատասխանատվության հարց: Ես չեմ կարծում, որ մի իրավիճակ, որը երկիրը դարձնում է տարբեր մեկնաբանությունների թիրախ, ձեռնտու է, մյուս կողմից` նաև ազատ հասարակություն է, և բոլորն էլ ունեն ազատ խոսքի իրավունք»,- ասում է Մինասյանը՝ հավելելով, որ ադրբեջանական կողմը կփորձի հայկական կողմի յուրաքանչյուր վրիպում, երկիմաստ հայտարարություններն օգտագործել ի նպաստ իր շահերի:

Ուշագրավ է, որ այս օրերին ադրբեջանական լրատվամիջոցներում տեղեկություն է տարածվել, թե Տերտերի շրջանում գտել են հայկական կողմից արձակված սպիտակ ֆոսֆորային չպայթած արկ, ինչը սակայն հերքում է հայկական կողմը: