ԼՂՀ ԱԳՆ. բանակցությունները պետք է վերականգնվեն եռակողմ ձևաչափով

Photo: Nazik Armenakyan/ ArmeniaNow.com

Պաշտոնական Ստեփանակերտը դրական է գնահատել Լեռնային Ղարաբաղի հարցով Վիեննայում կայացած Հայաստանի և Ադրբեջանի նախագահների հանդիպումը, բայց կարծում է, որ բանակցությունների «եռակողմ ձևաչափը» պետք է վերականգնվի:

Մայիսի 16-ին միջազգային միջնորդների նախաձեռնած նախագահ Սերժ Սարգսյանի և իր ադրբեջանցի պաշտոնակից Իլհամ Ալիևի հանդիպման արդյունքների մասին հրապարակված մեկնաբանության մեջ Լեռնային Ղարաբաղի Հանրապետության արտաքին գործերի նախարարությունն ասել է. «Աջակցություն ենք հայտնում հանդիպման ընթացքում ձեռք բերված համաձայնությանը միջադեպերի հետաքննությունների անցկացման ԵԱՀԿ մեխանիզմի շուրջ աշխատանքներն ավարտելու և ԵԱՀԿ գործող նախագահի անձնական ներկայացուցչի գրասենյակն ընդլայնելու, ինչպես նաև ԿԽՄԿ հովանու ներքո անհայտ կորածների մասին տեղեկատվության փոխանակումը շարունակելու վերաբերյալ:

Մենք նաև կիսում ենք ԵԱՀԿ Մինսկի խմբի համանախագահ երկրների դիրքորոշումը, որոնք բացառում են հակամարտությունը ռազմական ճանապարհով լուծելու ցանկացած հնարավորություն և պնդում 1994 թ․ և 1995 թ. հրադադարի մասին համաձայնագրերի պահպանման անհրաժեշտությունը։

Նշված համաձայնագրերը, որոնք վերջ դրեցին լայնածավալ ռազմական գործողություններին և այդպիսով հնարավորություն ստեղծեցին՝ որոնելու ադրբեջանա-ղարաբաղյան հակամարտության խաղաղ կարգավորման ուղիները, կնքվել են բանակցություններին բոլոր երեք կողմերի՝ Ադրբեջանի, Լեռնային Ղարաբաղի Հանրապետության և Հայաստանի լիարժեք մասնակցության շնորհիվ։ Կարգավորման գործընթացի տրամաբանությունը պահանջում է հակամարտության վերջնական հանգուցալուծմանը հասնելու համար վերականգնել բանակցությունները հենց նշված եռակողմ ձևաչափով»։