4 + 4 + 4 ձևաչափի արդյունքները. Ընտրական օրենսգրքի նախագծի շուրջ ավարտված բանակցությունները տարբեր գնահատականների են արժանանում

Իշխանությունը հայտարարել է, որ ընդդիմության առնվազն երկու առաջարկ տեղ կգտնի Ընտրական օրենսգրքի նախագծում, որն այս շաբաթ հավանաբար կներկայացվի խորհրդարան, ինչը սակայն ընդդիմության ակնկալիքները այդքան էլ չի արդարացրել:

Կառավարության աշխատակազմի ղեկավար-նախարար Դավիթ Հարությունյանը ներկայացրել է ընդդիմության և քաղաքացիական հասարակության հետ անցկացվող Ընտրական օրենսգրքի շուրջ ՀԱԿ-ի առաջարկած 4+4+4 ձևաչափով հանդիպման արդյունքները, ինչպես նաև իշխանության դիրքորոշումը:

4 + 4 + 4 ձևաչափը նախատեսում էր հավասարության սկզբունքով Հայաստանի իշխանության, ընդդիմության և քաղաքացիական հասարակության ներկայացուցիչներին ներառել նոր Ընտրական օրենսգրքի նախագծի շուրջ քննարկումներին:

«Մենք առաջարկում ենք հրաժարվել քվեաթերթիկները և ծրարները հատուկ հաշվառման փաստաթուղթ համարելուց: Սա ամենակարևոր պահերից մեկն է, որովհետև բազմաթիվ կարծիքներ էին շրջանառվում, լուրեր, ասեկոսեներ, թե տպվում են կեղծ քվեաթերթիկներ»,- հայտարարել է նա:

Հարությունյանը նշել է, որ հրաժարվելու են նաև առաջարկվող գունավոր քվեաթերթիկներից. «Լինելու է անկյունը կտրված ծրար, ինքնասոսնձվող դրոշմանիշներ՝ յուրաքանչյուր տեղամասի համար սպեցիֆիկ: Այն փակցվելու է քվեաթերթիկի վրա, որը երևալու է ծրարի կտրված անկյունից»,- նշել է նա:

Իշխանությունը մասամբ է ընդունել ընդդիմության առաջարկը՝ ունենալ երկու ցուցակ՝ ՀՀ-ում գտնվող ու բացակա քաղաքացիների մասին. «Ամեն կուսակցության ներկայացուցիչ կարող է իր համար ստեղծել նման ցուցակներ ու նույնը էլեկտրոնային տարբերակով լինի, և քվեարկության ժամանակ սարքը մի լրացուցիչ ազդանշան կարող է տալ, որ այս մարդը ենթադրաբար բացակայում է երկրից»:

Նա նշել է, որ իշխանությունները չեն ընդունել ընդդիմության պահանջած մատների թանաքոտումը, սակայն իրենք ունեն կոնկրետ առաջարկություն:

«Յուրաքանչյուր ընտրող իր մատնահետքը կթողնի սարքի մեջ, իսկ հաջորդ օրը այդ հետքերը կհավաքվեն, ու դա պետք է լինի բոլոր մասնակից կուսակցությունների ներկայացուցիչների ներկայությամբ: Դրանք կհամադրվեն ու կդրվեն կենտրոնական սերվերի մեջ և կիմանանք՝ արդյոք կա՞ն ընտրողներ, որոնց մատնահետքերը կրկնվում են»,- նկատել է նա:

Ինչ վերաբերում է քվեարկությունից հետո ստորագրված ընտրացուցակների հրապարակմանը, Հարությունյանն ասել է, որ իրենք միանշանակ չեն ընդունել դա:

Կոնսեսուսը չկայացավ` հայտարարել է ՀԱԿ խմբակցության ղեկավար Լևոն Զուրաբյանը, նշելով, որ բանակցությունները չտվեցին համապատասխան արդյունք:

«Այս պահին արձանագրենք, որ կոնսենսուսը չկայացավ, և մենք այս ֆորմատի բանակցությունները համարում ենք ավարտված՝ մի փոքր հավելումով: Եթե ձեր կողմից որևէ ազդանշան լինի, որը ցույց է տալիս ձեր պատրաստակամությունը ինչ-որ լուրջ զիջումների գնալ, որոնք մեր հասարակության, հանրության համար ընկալելի կլինեն, մենք պատրաստ կլինենք դրանք վերսկսել: Այս պահին այն զիջումները, որ դուք կատարում եք, բացարձակապես բավարար չեն հասարակության, հանրության, ընդդիմության ակնկալիքներին»,- եզրափակել է նա: