Հեռարձակման դաշտից դուրս. մրցույթից հետո հաղորդումները փոխում են իրենց «հասցեն»

Հեռարձակման դաշտից դուրս. մրցույթից հետո հաղորդումները փոխում են իրենց «հասցեն»


Անցյալ շաբաթ ավարտվեց չորս հայկական հեռուստաընկերությունների արտոնագրերի ժամկետը, որոնք, ըստ Հեռուստատեսության և ռադիոյի ազգային հանձնաժողովի վերջին որոշման, չեն վերականգնվի:


Նրանց թվում են միակ մանկական հեռուստաալիք «Հայրենիքը» և հոգևոր-մշակութային «Շողակաթ» ալիքը:

Հայաստանում թվային հեռարձակման անցնելու մասին նոր օրենքի համաձայն` ստեղծվելու է թվային հեռարձակման ցանց, ըստ որի` նախկին 22-ի փոխարեն կգործի 18 հեռուստաալիք:

«Հայրենիք», «Շողակաթ» և TV 5 հեռուստաընկերությունները հեռուստատեսային կապուղիների համար հայտարարված մրցույթին հայտ չէին ներկայացրել:

«Շողակաթ» հեռուստաալիքը հիմնվել է որպես հոգևոր-մշակութային ուղղվածություն ունեցող հեռուստաալիք, ուստի կապուղիների մրցույթում մենք չէինք կարող մասնակցել ընդհանուր կամ լրատվական ուղղվածություն ունեցող հեռուստաալիքների հետ»,- ասում է «Շողակաթ» հեռուստաընկերության ծրագրերի տնօրեն Արա Գալոյանը:

«Շողակաթ» հեռուստաընկերությունը ստեղծվել է Հայ Առաքելական եկեղեցու Արարատյան հայրապետական թեմի գործունեությունը լուսաբանելու և քարոզչությունն ակտիվացնելու նպատակով:
Հունվարի 21-ից արդեն այս հեռուստաընկերության հաղորդումները հեռարձակվում են Հանրային հեռուստաընկերությանը պատկանող «Արարատ» հեռուստաալիքի 48-րդ հաճախությամբ:

«Հայրենիք» հեռուստաընկերությունը, որը հիմնվել է 2001 թվականին, իր մանկական հաղորդումների շարքը հեռարձակում է «Ար» հեռուստաալիքով ամեն օր ժամը 14-ից մինչև 17-ն ընկած սահմաններում:

«Ծրագրվում է, որ միավորումը թույլ կտա «Ար» հեռուստաալիքին ներկայացնել հաղորդումների ավելի լայն շրջանակ և հեռուստադիտողի առջև հանդես գալ նոր լույսի ներքո»,- տեղեկացնում են «Ար» հեռուստաընկերությունից:

Հեռուստադիտողներից շատերը հատկապես դժգոհում են հեռուստաեթերում «Հայրենիք» և «Շողակաթ» հեռուստաընկերությունների բացակայությունից:

«Շողակաթն» ու «Հայրենիքը» Հայաստանում գործող հեռուստաալիքներից ամենալավն էին, երեխաները մեծ հաճույքով նայում էին նրանց հաղորդումներն ու ֆիլմերը, որ դրանք էլ չլինեն, էլ ի՞նչ պիտի նայենք»,- ասում է երկու երեխաների մայր Նոնա Գուլքանյանը:

2010 թվականի դեկտեմբերի 16-ին Հայաստանում կայացած հեռուստատեսային կապուղիների մրցույթի արդյունքներով` թվային հեռարձակման արտոնագիր չեն ստացել մրցույթին մասնակցած «Ա1+», «ԱԼՄ» հեռուստաընկերությունները, իսկ մարզային հաճախություններում` Գյումրու «ԳԱԼԱ» ընդդիմադիր հեռուստաալիքը:

Ինչ վերաբերում է TV5-ին, ապա այդ հեռուստաընկերությունը պատկանում է «Արմենիա TV» և «Արմնյուզ» հեռուստաընկերությունների սեփականատերերին և, ըստ նրանց, այս հեռուստաալիքի հեռարձակումն անարդյունավետ էր:

Եթե երեք հեռուստաընկերությունները մրցույթում հայտ չէին ներկայացրել, ուստիև պատրաստ էին եթերազրկմանը, ապա «ԱԼՄ» հեռուստաընկերությունը ներկայացրել և պարտվել էր «Երևան» հեռուստաընկերությանը, որից հետո «ԱԼՄ»-ի սեփականատեր Տիգրան Կարապետյանն այսօր արդեն դուրս է եկել քաղաքական պայքարի` մասամբ բողոքելով եթերազրկման դեմ: