Հարցեր լուծող. ըստ ֆինանսական հաշտարարի` 2011-ին ավելի շատ բողոք-դիմումներ սպառողներից

Հայաստանի ֆինանսական համակարգի հաշտարարի գրասենյակը 2011 թ. ավելի շատ բողոք-դիմումներ է ստացել սպառողներից, քան նախորդ տարի` արդյունքում մոտավորապես կրկնակի փոխհատուցում վճարելով նրանց:


Սպառողների նման 803 բողոք-դիմում է ներկայացվել (ի տարբերություն 2010-ին ներկայացրած 642-ի), իսկ փոխհատուցումների ընդհանուր գումարն աճել է 2010 թ. 29,3 մլն դրամից (75.000 դոլար) մինչև 2011-ի 58,1 մլն դրամ (150.000 դոլար):

Ֆինանսական համակարգի հաշտարարի գրասենյակը Երևանում գործում է արդեն 3 տարի: Որպես միջնորդ օղակ` այն լուծում է ֆինանսական կազմակերպությունների ու սպառողների միջև առաջացած վեճերը` բարձրացնելով հանրության վստահությունը ֆինանսական շուկայի նկատմամբ:

Հաշտարարի գրասենյակը զբաղվում է ֆիզիկական անձանց և բանկերի, ապահովագրական ընկերությունների, վարկային, ներդրումային կազմակերպությունների, գրավատների միջև ծագած վեճերը լուծելով:

«Ըստ մեր ցուցանիշների`սպառողների վստահությունը մեծանում է ֆինանսական համակարգի հաշտարարի գրասենյակի նկատմամբ: Այսօր հաճախորդները հանգիստ օգտվում են ֆինանսական ծառայություններից, որովհետև կա մի կառույց, որտեղ արագ և անվճար կարող են լուծել իրենց հարցերը, մասնավորապես, գույքային վեճերը»,- ասում է ֆինանսական համակարգի հաշտարար Փիրուզ Սարգսյանը:

2011 թ. հաշտարարի գրասենյակի քննած բողոքներն ավելի շատ ուղղված են եղել բանկերին, քան ապահովագրական ընկերություններին: Փիրուզ Սարգսյանը նշում է, որ դրանք հիմնականում կապված են եղել վարկային, վճարահաշվարկային գործարքների, իսկ ապահովագրական ոլորտում` ճանապարհատրանսպորտային միջոցների պարտադիր ապահովագրման (ԱՊՊԱ) հետ:

«Մեր գործունեության սկզբում մարդիկ մեզ էին դիմում տարբեր խնդիրներով` հարևանից պարտքը հետ չստանալու, ամուսնալուծության, դատարանում լուծում չստացած մի շարք հարցերով, որոնք մեզ հետ կապ չունեին»,- ասում է Սարգսյանը` հավելելով, որ նման դիմումներ այլևս գրեթե չեն ունենում:

Ֆինանսական համակարգի հաշտարարը կարևորում է նաև սպառողների ֆինանսական գրագիտությունը բարձրացնելու անհրաժեշտությունը:

«Անցկացնում ենք դասընթացներ դպրոցականների, ուսանողների և տարեցների հետ, որպեսզի մարդիկ տարրական գիտելիքներ ունենան ապահովագրության, քարտի, ավանդի, վարկի մասին»,- ասում է Սարգսյանը:

Քանի որ բանկերի և ապահովագրական ընկերությունների հետ համանման խնդիրներ կարող են ունենալ նաև այլ հաճախորդներ, ֆինանսական համակարգի հաշտարարը բանակցում է ֆինանսական կազմակերպությունների հետ նաև փոփոխություններ կատարելու համար:

«Մենք ունեցել ենք մի քանի դեպքեր ֆինանսական կազմակերպությունների հետ, երբ խնդրի մեջ ներգրավված են եղել մեծ թվով հաճախորդներ: Դատական խոշոր ծախսերից խուսափելու համար` ֆինանսական կազմակերպությունը նախընտրել է մեզ հետ բանակցել և կատարել անհրաժեշտ պայմանագրային փոփոխություններ»,- ասում է Սարգսյանը:

Ըստ հաշտարարի գրասենյակի պահանջներն ընդունող ու քննող խմբի ղեկավար Հրանուշ Աղայանի` դեռ չի եղել դեպք, որ հաճախորդի բողոքը մերժելուց հետո դատարան դիմած սպառողի հայցը բավարարված լինի:

«Կան չքննվող գործեր, որոնց լուծում տալը մեր իրավասությունների մեջ չի մտնում, օրինակ` իրավաբանական անձանց հայցերը կամ բանկի վարկ չտրամադրելը որևէ ֆիզիկական անձի: Այդ չքննվող գործերից հետո սպառողներից շատ քչերն են դիմել դատարան, քանի որ մեր ներկայացրած փաստարկները հավաստի են նրանց համար»,- ասում է Աղայանը:

Սպառողը խնդիր ունենալու դեպքում պետք է դիմի նախ և առաջ ֆինանսական կազմակերպությանը: Լուծում չստանալու դեպքում բողոքի պահանջով կարող է դիմել ֆինանսական համակարգի հաշտարարին:

Ըստ Աղայանի` 2011 թ. գրանցվել է 43 դեպք, երբ հաշտարարի խորհրդով հաճախորդը դիմել է ֆինանսական կազմակերպությանը, և նրա պահանջը բավարարվել է: