Երկարաձգված ձմեռային արձակուրդ. գրիպի հետևանքով փակ դպրոցները կազդեն առաջին դասարանցիների «հարմարվողականության» հմտությունների վրա

H1N1 տեսակի վիրուսի, այսպես կոչված` խոզի գրիպի վերջին բռնկման հետևանքով դպրոցական ձմեռային արձակուրդի երկարաձգումը կարող է վատ անդրադառնալ կրթական գործընթացի վրա` կարծում են որոշ մանկավարժներ: Բայց կրթության ոլորտի պատասխանատու պաշտոնյաները վստահեցնում են, որ սուր շնչառական վիրուսների տարածումը կանխելու նպատակով, որն արդեն 18 մարդու կյանք է խլել, այդ հարկադիր քայլը չի ազդի` ձեռնարկելիք միջոցների շնորհիվ:

Անցյալ շաբաթ, հայտարարելով դպրոցական ձմեռային արձակուրդը մինչև փետրվարի 1-ը երկրորդ անգամ երկարաձգելու մասին, կրթության և գիտության նախարար Արմեն Աշոտյանը շրջաբերական էր ուղարկել նախարարության ենթակայության հանրակրթական ուսումնական հաստատությունների տնօրեններին` առարկայական ծրագրերի կատարումն ապահովելու, բաց թողնված 3 շաբաթները լրացնելու համար օգտագործել գարնանային արձակուրդի համար նախատեսված օրերը, ինչպես նաև դասացուցակներում կատարել համապատասխան փոփոխություններ՝ ավելացնել 1 դասաժամ կամ օգտագործել շաբաթ օրերը:

Գրեթե 20 օրով երկարաձգված արձակուրդը բուռն քննարկվում է ուսուցիչների, աշակերտների ու ծնողների շրջանում: Էջմիածնի «Էօրնեկեան» հանրակրթական դպրոցի ուսումնական գծով փոխտնօրեն Ալվինա Պետրոսյանը «ԱրմենիաՆաուին» ասում է, որ առողջությունն առաջնային է, և երեք շաբաթով երկարաձգելը չի կարող գցել կրթության որակը:

«Եթե հիվանդության պատճառով աշակերտների բացակայությունները շատ լինեին, այսպես թե այնպես կրթական գործընթացը թերի էր լինելու, ըստ այդմ էլ որակի վրա էր ազդելու: Պարզապես պետք է աշխատենք բացը թողնվածը լրացնել»,- ասում է Պետրոսյանը:

Մինչդեռ հոգեբան Աննա Բադալյանի կարծիքով` երեխաներին տանը պահելով` նրանց «ջերմոցային տեսակ են դարձնում»:

«Հասկանում ենք, որ պետությունը գուցե չունի հնարավորություն՝ ապահովելու աշակերտների առողջական խնդիրների ամբողջական լուծումը, բայց տանը նստելով՝ երեխաները զրկվում են կամային հատկություններից, որովհետև նրանք տարրական հիգիենիկ կանոններն անգամ չեն կարողանալու պահպանել: Չեն իմանալու ապագայում իրենց ինչպես դրսևորել արտակարգ իրավիճակներում»,- ասում է Բադալյանը:

Ըստ հոգեբանի` երկար արձակուրդը խոչընդոտելու է հատկապես առաջին դասարանցիների հարմարվողականությանը, քանի որ այս տարիքի երեխան ճգնաժամ ունի և նոր-նոր է սկսել հարմարվել շրջապատին, ընկերներին, մինչդեռ երկար արձակուրդը խորացնում է ճգնաժամը, ինչի պատճառով երեխան կարող է հետ վարժվել իր հմտություններից:

Բենիամին Ժամկոչյանի անվան 119-րդ դպրոցի ուսուցչուհի Հասմիկ Սահակյանի կարծիքով` այդուհանդերձ չպետք է մոռանալ հիվանդ աշակերտների մասին, և պետք է նախ և առաջ մտածել առողջական խնդիրները հաղթահարելու մասին:

«Եթե դասերը չհետաձգվեին, բացակաների թիվը հսկայական կլիներ: 20 հոգանոց դասարանում 8 աշակերտ հիվանդ է եղել: Հետևաբար, վտանգ կար, որ հիվանդությունը կտարածվի, եթե աշակերտները մի վայրում հավաքվեին,- ասում է Հասմիկ Սահակյանը և ավելացնում, որ դասերը ևս մեկ շաբաթով ուշ սկսելը աշակերտների շրջանում ադապտացիայի խնդիր կառաջացնի: - Առաջին դասարանցիների մոտ ադապտացիան դժվար է ընթանում, բայց նույն խնդիրը բարձր դասարանցիների մոտ էլ կա: Արձակուրդի ժամանակ սովորում են ուշ քնել-ուշ արթնանալ: Առաջին ժամերին ուղեղն արթնացած չի լինում և դժվար է դասն ընկալել»: