Այն, ինչ ներկայումս կատարվում է Թուրքիայում, այնքան էլ ձեռնտու չէ Հայաստանին` լրագրողների հետ հանդիպմանը նման կարծիք հայտնեց թուրքագետ Անուշ Հովհաննիսյանը:

Նրա խոսքով` Թուրքիայի ներքաղաքական զարգացումները հանգեցնում են ազգային տարրի զարգացմանը, իսկ Հայաստանին ձեռնտու չէ նման հարևան ունենալը:

Անդրադառնալով ռուս-թուրքական հարաբերությունների զարգացմանը և Պուտին-Էրդողան հանդիպմանը` Հովհաննիսյանը նշեց, որ Հայաստանի համար այդ բանակցությունները այնքան էլ նշանակություն չունեն:

«Սա մեծ քաղաքական խաղ է, և Հայաստանը պարզապես պետք է սպասի, թե ինչով կավարտվի այն, մանավանդ երբ արտաքուստ մեղրային թվացող ռուս-թուրքական հարաբերությունները իրականում այնքան էլ հարթ չեն»:

Թուրքագետի խոսքով` կան հարցեր, որոնց շուրջ այդ երկրները անհամաձայնություն ունեն.

«Հարաբերությունները էլ ավելի լարվեցին, երբ Հայոց ցեղասպանության միջոցառումներին եկավ մասնակցելու Պուտինը, արտասանեց «ցեղասպանություն» բառը: Բացի այդ, Թուրքիայի համար խնդրահարույց է մնում Սիրիայի, Ղրիմի թաթարների հարցը»:

Նա նշեց, որ այդ հանդիպման արդյունքում միայն առևտրաշրջանառությանը վերաբերող համաձայնություն կայացվեց:

Սեպտեմբերի 23-ին Կրեմլում տեղի է ունեցել Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումը, որի ժամանակ քննարկվել են Սիրիայի հարցը և թուրք-ռուսական գազատարի՝ «Թուրքական հոսքի» նախագծի վերսկսմանը վերաբերող խնդիրները:

Ռուսաստանի և Թուրքիայի նախագահների երկրորդ հանդիպումը տեղի կունենա տարեվերջին կայանալիք Ռուսաստան-Թուրքիա բարձր մակարդակի համագործակցության խորհրդի նիստի ժամանակ: